Detaljrik surrealisme
Utstillinga til Øyvind Sture er ei oppvising i detaljrik
surrealisme.
Saman med maskene til elevane i 3. klasse ved formgjevingslinja til KVV
utgjer Øyvind Sture sine leirefigurar basisen i utstillinga «Masker».
Utstillinga, som opna laurdag, er eit godt høve til å sjå flott arbeid
utført av lokale krefter.
– Kjekk prosess
Leirefigurane til Øyvind Sture utgjer hovudattraksjonen på utstillinga.
Dei tretten figurane han har stilt ut er imponerande detaljrike og
uttrykksfulle.
– Det er lov å bli litt flaue når ein ser figurane på nært hald, sa Gøril
Guddal då ho opna utstillinga.
Ho sikta nok til dei av figurane som er eksplisitt erotiske. Sams for alle
er det surrealistiske uttrykket. Personar med to hovud, kropp som er mann
på eine sida og kvinne på andre sida, to armar men berre ei handflate.
– Å jobba med leire er ein annan type prosess enn maling, som er ein
veldig direkte måte å jobba. Eg veit ikkje heilt kva det skal bli når eg
byrjar, men eg leikar med leira. Det er ein kjekk prosess. Eg har halde på
ei stund med figurane, dei eldste er opptil to å gamle, seier Sture.
Masker
52-åringen frå Rælingen har budd lenge i Uskedalen, og er ein del av
det kvinnherske kunstnarmiljøet. Han har mellom anna undervist i teikning,
maleri og grafikk i ti år ved Sunnhordland Folkehøgskule på Halsnøy. Det
siste året har han undervis ved formgjevingslinja til Kvinnherad
vidaregåande skule. Nettopp tredje klasse ved denne linja er med på
utstillinga.
Kvar av dei tolv elevane har tatt avstøypingar av sitt eige andlet, og
kvar av elevane har stilt ut to masker laga av denne avstøypinga. Ein
variant av maskene er porselenskvit og uhandsama, medan den andre
varianten er dekorert.
Ole Jørgen Onarheim synte på utstillingsopninga fram sin kortfilm, som er
laga i saman med formgjevingsklassen på førespurnad frå Sture.
– Det er ein litt djup film, som spelar litt på eksistensialisme,
surrealisme, forvirring og forholdet mellom menneske, seier Onarheim.
Utstillingsopninga trekte som vanleg eit fullt galleri. Velleta som gjekk
i retning Sture og KVV-elevane var udelt positiv.
– Imponerande, var adjektivet som gjekk mest att.
Håvard Sætrevik (Grenda 11. april 2006)